Школьнікаў Глыбоччыны прымусяць здаваць дзяржаве слівы, грушы, яблыкі, моркву і бульбу

Глыбоцкіх школьнікаў прымусяць здаваць сельгаспрадукцыю. Такое даручэнне даў кіраўнік раёна Алег Морхат на чарговым паседжанні райвыканкама, паведамляе раёнка "Веснік Глыбоччыны".

Кожнай навучальнай установе будзе даведзены план па здачы яблыкаў, сліваў, грушаў, морквы і бульбы.

Кіраўнік раёна запатрабаваў, каб улады адсочвалі выкананне планаў школамі.

"Адказнасць павінна быць! У нас вялікі патэнцыял нявыкарыстаных рэзерваў як у плане плодагародніннай прадукцыі, так і мясной. Можам гадаваць і авечак, і індыкоў, і трусоў… Адна праблема: няма жадання  напружвацца", - заявіў Алег Морхат.