Бацькі дзяцей да трох гадоў будуць цалкам аплачваць садок

Групы для дзяцей ва ўзросце да 3 гадоў будуць функцыянаваць толькі на платнай аснове з поўным пакрыццём бацькамі выдаткаў на ўтрыманне малых, паведамляе агенцтва Мінск-Навіны.

Чыноўнікі падлічваюць, што год у садку абыходзіцца дзяржаве ў 19 мільёнаў рублёў.

"Унесці дадатак у артыкулы №№ 3 і 142 Кодэкса аб адукацыі, згодна з якімі групы для дзяцей ва ўзросце да 3 гадоў будуць функцыянаваць толькі на платнай аснове з поўным пакрыццём бацькамі выдаткаў на ўтрыманне малых. 

Шматдзетныя сем'і ды іншыя льготныя катэгорыі грамадзян гэтая норма не закране. У той жа час працуючым маці, дзецям якіх яшчэ не споўнілася 3 гады, прапануюць выплочваць дапамогу па доглядзе за дзіцем у поўным аб'ёме", - перадае агенцтва абмеркаванне з круглага стала па рэфармаванні адукацыі ў гімназіі №22.

Група па аналізе сістэмы адукацыі пры ўрадзе працуе ўжо трэці месяц. Акрамя віцэ-прэм’ера Анатоля Тозіка праблемы ў адукацыі вырашаюць міністр адукацыі Сяргей Маскевіч, Уладзімір Здановіч, Уладзімір Шымаў - агулам 36 чалавек.