На Віцебск насоўваецца расейская экспансія, заяўляе праваабаронца

"У гандляроў сувэнірамі, якія стаяць уздоўж вуліцы Суворава ў Віцебску, можна часам заўважыць прадукцыю вельмі сумнеўнага ідэалягічнага зьместу, не кажучы ўжо пра мастацкія вартасьці. Ды прыкладу, гэты магніт. На ім выявы дзяржаўных сьцягоў Беларусі і Расеі, а таксама выявы Аляксандра Лукашэнкі і Ўладзімера Пуціна, якія паціскаюць адзін аднаму рукі. Подпіс:"Расея. Белая і Вялікая". Нібыта абедзьве дзяржавы ёсьць адзінай краінай”, - паведаміў Левінаў Радыё “Свабода”.

"На Беларусь, у прыватнасьці, на горад Віцебск, марудна, але ўпэўнена распаўсюджваецца экспансія з боку Расейскай Фэдэрацыі. То ў нас нейкія людзі, прыкідваючыся глуханямымі, раздаюць расейскія сьцяжкі, а ДАІ нібыта не заўважае парушэньняў, нават калі гэта адбываецца на праезднай частцы. ДАІ не зьвяртае ўвагу і на георгіеўскія стужкі, затое бела-чырвона-белую сымболіку прымушае прыбіраць. Цяпер вось ажыцьцяўляецца продаж сувэнірнай прадукцыі антыбеларускага зьместу. Я лічу неабходным, каб кіраўніцтву Віцебска і вобласьці ўказалі на недапушчальнасьць падобных рэчаў", — напісаў у звароце да Лукашэнкі Левінаў.

Гандаль сувэнірнай прадукцыяй на пешаходнай частцы вуліцы Суворава ў цэнтры Віцебску санкцыянаваны мясцовымі ўладамі. Разьлік зроблены на тое, што яна прыцягне ўвагу турыстаў.

На памежнай Віцебшчыне самая большая частка турыстаў — менавіта з Расейскай Фэдэрацыі.