Генпракуратура – фрылансерам: самі абскарджвайце прысуды

"Беларуская асацыяцыя журналістаў" атрымала адказ на сваю заяву пратэсту з нагоды пераследу журналістаў, якія размяшчаюць свае матэрыялы ў замежных медыя, за што прыцягваюцца да адміністрацыйнай адказнасці.

"Калі названыя ў вашым звароце асобы лічаць, што ў выніку прыцягнення да адміністрацыйнай адказнасці парушаны іх правы і законныя інтарэсы, яны маюць права самастойна звярнуцца з адпаведнымі скаргамі ў органы пракуратуры ці ў суд у парадку, устаноўленым Працэсуальна-выканаўчым кодэксам ад адміністрацыйных правапарушэннях (ПВКаАП)”, – гаворыцца ў лісце за подпісам начальніцы аддзела па нагляду за захаваннем правоў і свабод грамадзян Паповай М.В.

У Генпракуратуры лічаць, что сцверджанне пра неадпаведнасці асобных норм нацыянальнага заканадаўства артыкулу 19 Міжнароднага пакта аб грамадзянскіх і палітычных правах з’яўляецца неабгрунтаваным.

Папова нагадвае, што беларускі закон “Аб СМІ” не толькі гарантуе грамадзянам свабоду поглядаў і іх выяўлення, але і ўтрымлівае шэраг абмежаванняў – у тым ліку датычна дзейнасці прадстаўнікоў замежных СМІ без акрэдытацыі.

“Пры гэтым замацаваныя ў названым Законе абмежавальныя меры не супярэчаць нормам Міжнароднага пакта, згодна з арт. 19 якога права на свабодную перадачу сваіх поглядаў накладае асаблівыя абавязкі і адказнасць, у сувязі з чым яно можа спалучацца з некаторымі абмежаваннямі, якія павінны быць устаноўленыя законам і з’яўляцца неабходнымі для павагі правоў і рэпутацыі іншых асоб, а таксама аховы дзяржаўнай бяспекі, грамадскага парадку, здароўя ці маральнасці”, -- гаворыцца ў яе адказе.