Дырэктарка ЕФЖ: Паняцце «штатны журналіст» паціху адыходзіць у нябыт

Так дырэктарка Еўрапейскай федэрацыі журналістаў сфармулявала асноўны “мэсыдж” прадстаўнікам беларускіх дзяржаўных структур, адказных за медыясферу.

“Я маю на ўвазе, што паняцце “штатны журналіст” паціху адыходзіць у нябыт, а фрыланс-журналістыка робіцца якраз самым распаўсюджаным спосабам выканання неабходнай працы. Нельга забараняць журналістам выконваць іх працу”, – падкрэсліла яна ў гутарцы з прэс-служба ГА “Беларуская асацыяцыя журналістаў”.

Спн. Шродэр зноў выказала шкадаванне, што прадстаўнікі ўладаў не прыйшлі на круглы стол 13 кастрычніка: “Дыялог павінен быць. І мы перакананыя, што рана ці позна ён пачнецца. Пра гэта казала і прадстаўніца АБСЕ па свабоде СМІ Дуня Міятавіч, якая падкрэсліла, што ўхваляе дыялог і спадзяецца на рэформу ў медыясферы. Мы думаем, што іншага выйсця проста няма”.

На думку Рэнаты Шродэр, Беларусь застаецца цікавай для Еўропы, нягледзячы на драматычныя падзеі ва Украіне. А магчыма, пэўным чынам і дзякуючы ім.

“Мы спадзяемся, што Беларусь зможна знайсці больш мяккі шлях пераўтварэнняў, – зазначыла яна. – Я ведаю, што і ЕС зацікаўлены ў падтрыманні добрасуседскіх стасункаў і дыялогу з Беларуссю, і Савет Еўропы таксама мае інтарэс да Беларусі. Але, безумоўна, унутры самой Беларусі патрэбныя пэўныя перамены. ЕФЖ, са свайго боку, будзе рабіць усё дзеля інфармавання нашых сябраў пра журналістаў у Беларусі і старацца паўплываць непасрэдна на Савет Еўропы дзеля інтэнсіфікацыі дыялогу”.

Дырэктарка ЕФЖ Рэната Шродэр знаходзіцца ў Мінску з двухдзённым візітам у складзе дэлегацыі еўрапейскіх журналісцкіх арганізацый, у тым ліку Шведскага саюза журналістаў, Нарвежскага саюза журналістаў, Аўстрыйскага саюза журналістаў і Нацыянальнага саюза журналістаў Вялікабрытаніі.

Асноўная мэта візіту еўрапейскіх калег – азнаёміцца з умовамі працы беларускіх фрыланс-журналістаў і разам з імі падумаць, як справіцца з асноўнымі выклікамі ў іх працы. 13 кастрычніка ў Мінску адбыўся круглы стол «Роля і месца журналіста ў грамадстве. Асаблівасці дзейнасці журналістаў-фрылансераў у Еўропе і Беларусі». Удзень госці наведалі офіс ГА “БАЖ” і сустрэліся з кіраўніцтвам арганізацыі.

Паколькі ўсе дэлегаты ўваходзяць у склад экспертнай групы па фрыланс-журналістыцы ў межах ЕФЖ, менавіта ў Мінску адбылося яе чарговае пасяджэнне. З беларускага боку ў працы групы браў удзел сябра Рады ГА “БАЖ” Андрусь Клікуноў. Група абмеркавала планы на 5 лістапада (міжнародная акцыя “Станем за журналістыку”), вызначыла кола пытанняў для вэбінара па фрыланс-журналістыцы, які адбудзецца найбліжэйшым часам. Андрусь Клікуноў падкрэсліў важнасць правядзення сустрэчы экспертнай групы ў Мінску, бо гэта, на яго думку, дазволіць ўзняць дыскусію на тэму фрыланс-журналістыкі ў Беларусі на новы ўзровень. Паводле яго назіранняў, на момант пачатку кампаніі ГА “БАЖ” “За фрыланс!” лічаныя калегі лічылі і называлі сябе фрыланс-журналістамі, а цяпер іх значна больш.