Беларусы сёння адзначаюць Дзень беларускай вайсковай славы

Роўна 500 год таму войска ВКЛ на чале з гетманам Канстанцінам Астрожскім пад Оршай ушчэнт разбіла маскоўскіх захопнікаў. Лічыцца, што гэта адна з самых славутых бітваў у нашай гісторыі. Аднак у Беларусі яе ўгодкі адзначаюцца толькі неафіцыйна, паведамляе Еўрарадыё.

Чыноўнікі з Аршанскага райвыканкама не далі згоды на правядзенне 6 верасня на Крапівеньскім полі фэсту і канцэрту. Тым не менш, гэтыя мясціны наведалі каля 100 чалавек.

8 верасня а 19-й гадзіне ў Фарным касцёле ў Гродне пачнецца вялікі канцэрт, прысвечаны 500-м угодкам Аршанскай бітвы. Выступяць хоры з Беларусі, Літвы і Польшчы. Варта адзначыць, што значна шырэй святкуецца юбілей нашымі суседзямі - ўкраінцамі, літоўцамі і палякамі.

Да 500-годдзя Аршанскай бітвы ў Беларусі выдалі настольную гульню "1514".