Турыстычныя маршруты для інвалідаў ствараююца ў Брэсцкай вобласці

Людзі з абмежаванымі магчымасцямі хочуць карыстацца паслугамі айчыннага турызму. На жаль, пакуль большасць турыстычных аб’ектаў ды паслуг недасяжныя для іх, - паведамляе Радыё Рацыя.

Старшыня рэгіянальнай асацыяцыі інвалідаў-вазочнікаў Алена Макарчук кажа, што на Піншчыне ўжо распрацавана 6 адмысловых маршрутаў: "Мы распрацавалі маршруты па горадзе Пінску і Пінскаму раёну, азнаёмілі ўладальнікаў аграсядзібаў з правіламі і нормамі стварэння безбар’ернага асяроддзя. Таксама ў нас былі трэнінгі з псіхолагам на тэму „Псіхалагічная ўстойлівасць”.

Актывіст асацыяцыі Валерый Цімакін мяркуе, што гэтыя пытанні мусяць вырашацца на заканадаўчым узроўні. "У прынцыпе, калі б гэта ўсё вырашалася па законе, то мы б проста карысталіся, і праблем з гэтым не было б. Калі браць бягучы праект, за яго кошт атрымалася аб’яднаць інтарэсы не толькі інвалідаў-вазочнікаў, але і іншых катэгорый людзей з абмежаванымі магчымасцямі ў горадзе Пінску і Пінскім раёне. Многія ўпершыню даведаліся пра нас, пра тое, што мы цікавімся турызмам". Ініцыятары спадзяюцца, што гэта толькі першыя крокі ў вырашэнні праблемы, і ў хуткім часе беларускія інваліды змогуць шырока карыстацца паслугамі айчыннага турыстычнага бізнесу.