Поле Аршанскай бітвы ўзаралі трактары

Пра гэта Радыё Рацыя распавёў вядомы мастак Алесь Пушкін. Па яго словах, пасля таго, як трактары ўзаралі поле, на ім раскідалі гной. "У дзяржавы свая канцэпцыя святкавання 500-годдзя слаўнай бітвы", - іранічна заўважыў мастак.

На полі, дзе была бітва, няма манумента, - адзначае Алесь Пушкін. - Ёсць толькі дубовы крыж, які быў усталяваны ў 1992 годзе. Ёсць яшчэ камень з шыльдай “Вечная слава героям Аршанскай перамогі 1514 год”. Таксама ў гэтым годзе з’явіліся тры камяні з выявамі Сапегі, Хадкевіча і гетмана Астрожскага.

Напачатку 90-ых гадоў на Аршанскім полі пры падтрымцы гарадскіх ўладаў праводзіўся фэст бардаўскай песні: прывозілі лавы з Дому культуры, з аўталавак прадавалі прадукты. Пасля, у 2000-х, улады нейтральна ставіліся да святкавання перамогі. А ў 2014, у год 500-годдзя Аршанскай бітвы, адзначаць свята афіцыйна забаранілі. Аднак беларуская грамадскаць усё адно намерана правесці 8-га верасня штогадовы сход.