Стары парк у Баранавічах хочуць перайменаваць у гонар Лукашэнкі

Парк імя 60-годдзя СССР у Баранавічах хочуць перайменаваць у Парк першага прэзідэнта Беларусі, паведамляе  Intex-press .

Збор подпісаў пачалі чальцы баранавіцкага аддзялення прафсаюза РЭП. Ліст з подпісамі яны плануюць накіраваць у гарвыканкам.

Як адзначылі актывісты, назвы гарадскіх паркаў імя 30 год УЛКСМ (малады) і імя 60 год СССР (стары) даўно не адпавядаюць сучасным рэаліям і састарэлі. Гараджане прапануюць малады парк перайменаваць у парк Герояў Беларусі, а парк імя 60-годдзя СССР - у Парк першага прэзідэнта Беларусі.

У звароце да гарадскіх уладаў гаворыцца, што грамадскія актывісты неаднаразова звярталіся да кіраўніцтва Баранавіч з прапановамі добраўпарадкавання, рэканструкцыі гарадскіх паркаў, усталявання там новых атракцыёнаў, каб зрабіць іх больш камфортнымі для адпачынку жыхароў і гасцей горада. Але, па словах актывістаў, на іх звароты не звярталі ўвагі. Магчыма, згадка прэзідэнта дапаможа нешта змяніць, спадзяюцца яны.