Гомельскія гісторыкі да 365-годдзя Лоеўскай бітвы стварылі гісторыка-дакументальны фільм

Лоеўская бітва адбылася 31 ліпеня 1649 года паміж войскам польнага гетмана Вялікага Княства Літоўскага Януша Радзівіла і войскам наказнога казацкага гетмана Міхайла Станіслава Крычэўскага. У фільме распавядаецца пра абставіны геапалітыкі таго часу, асобу Януша Радзівіла і гетмана Крычэўскага, ход бітвы, паведамляе БелаПАН.

"Ідэя стварэння фільма з’явілася яшчэ падчас вучобы на гістарычным факультэце Гомельскага дзяржаўнага ўніверсітэта імя Ф.Скарыны, - гаворыць адна з аўтараў фільма Марыя Булавінская. - Тады мы, група энтузіястаў, пазычылі ў музеях, тэатрах, розных клубах строі таго часу і пачалі ўласнымі сіламі засвойваць камп`ютарныя тэхналогіі, дзякуючы якім можна было рэканструяваць некаторыя сюжэты бітвы. Увогуле гэтая тэма стала цікавай для стварэння фільма, бо даведаліся, што ў Лоеве таксама ёсць энтузіясты, якія неабыякавыя да сваёй мінуўшчыны і дбаюць пра тое, каб у будучыні на месцы бітвы з’явіўся мемарыяльны комплекс".

Фільм складаецца з дзвюх частак пад назвамі: "1649. У пошуках месца бітвы" і "1649. Па слядах Крычэўскага".

У гадавіну бітвы ў Лоеве адбылася першая прэзентацыя фільма, перад якой актывісты гомельскага аддзялення ТБМ і неабыякавыя лоеўчане наведалі месца падзей і ўсклалі кветкі ля памятнага крыжа.