Праваабаронцы заклікаюць грамадзянскую супольнасць далучыцца да абароны азербайджанскіх калег

Праваабарончы цэнтр “Вясна” заклікае прадстаўнікоў грамадзянскай супольнасці далучацца да заявы з пратэстам супраць палітычнага пераследу вядомых праваабаронцаў Азербайджана, якая на наступным тыдні будзе перададзена ў амбасаду Азербайджанскай Рэспублікі ў Беларусі.

У заяве, прынятай 31 ліпеня з нагоды ўзяцця пад варту дырэктара Інстытут міра і дэмакратыі Лэйлы Юнус, якой прад’яўлены сур’ёзныя абвінавачанні, канстатуецца, што ў Азербайджане сістэматычна парушаюцца грамадскія і палітычныя правы, ажыццяўляецца палітычна матываваны пераслед дэмакратычных актывістаў, грамадскіх дзеячоў і праваабаронцаў, якія па сфабрыкаваных справах прыцягваюцца да крымінальнай адказнасці.

Так, каля двух месяцаў таму ў Баку да турэмнага тэрміну ў пяць з паловай гадоў быў прыгавораны праваабаронца Анар Мамедлі, кіраўнік Цэнтра маніторынгу выбараў і навучання дэмакратыі, якому ўлады помсцяць за выкрыццё фальсіфікацыяў падчас прэзідэнцкіх выбараў 2013 года.

Асаблівае абурэнне гэтыя рэпрэсіі выклікаюць у сувязі з тым, што з траўня 2014 года Азербайджан распачаў старшынства ў Камітэце міністраў Савета Еўропы.

Беларускія праваабаронцы выказваюць салідарнасць са зняволенымі азербайджанскімі калегамі, патрабуюць ад рэжыму Аліева неадкладнага вызвалення ўсіх без выключэння палітычных вязняў. Таксама дзеля іх вызвалення заклікаюць ЕС і ЗША, нягледзячы на эканамічныя кантакты з Азербайджанскай Рэспублікай, прыняць усе магчымыя захады для аказання ціску на ўрад гэтай краіны.

Да заявы ўжо далучыліся Цэнтр прававой трансфармацыі Lawtrend, "Праваабарончы альянс", грамадскія актывісты Дар'я Корсак, Аляксандр Атрошчанкаў, Лявон Садоўскі.