Баранавіцкага прадпрымальніка аштрафавалі на 4,5 мільёна за мітынг пратэсту

Личности

Баранацікі суд аштрафаваў прадпрымальніка  Мікалая Чарнавуса на 4,5 мільёнаў рублёў, прызнаўшы яго вінаватым у арганізацыі несанкцыянаванай акцыі 1 ліпеня. Прадпрымальнік збіраецца абскардзіць прысуд.

Суд апытаў сведку — дырэктара цэнтральнага кааператыўнага рынка Баранавічаў.

«Яго паказанні не супярэчылі маім, і ўсё гаварыла пра тое, што я не з’яўляўся арганізатарам таго мерапрыемства, у якім мяне абвінавацілі. Але суддзя вырашыў інакш», — заявіў прадпрымальнік у інтэрв’ю БелаПАН.

1 ліпеня каля 300 індывідуальных прадпрымальнікаў, якія гандлююць на рынках і ў гандлёвых цэнтрах Баранавічаў, прыпынілі працу на знак пратэсту супраць прэзідэнцкага ўказа № 222, які істотна ўскладняе іхную працу. Людзі сабраліся на цэнтральным каапэратыўным рынку Баранавічаў, а затым скіраваліся ў гарвыканкам, каб абмеркаваць з чыноўнікамі праблемы, звязаныя з увядзеннем указа. Аднак чыноўнікі ўсе разбегліся, а прадпрымальнікі ў актавай зале правялі сход, па выніках якога прынялі рэзалюцыю на імя кіраўніка дзяржавы (відэа Радыё Свабода). 

Мікалая Чарнавуса затрымалі 2 ліпеня. У міліцыі прадпрымальніку, які з’яўляецца інвалідам II групы, стала блага. Цягам пяці гадзін прадпрымальнік прасіў у міліцыянтаў выклікаць хуткую дапаогу, аднак ягоныя просьбы ігнараваліся.

І толькі пасля складання пратаколу прадпрымальніка адправілі ў ізалятар часовага ўтрымання, дзе ў яго рэзка падняўся ціск. Машына «хуткай дапамогі» адвезла Чарнавуса з пастарунка ў шпіталь.