Луцэнка: Беларусы не павінны ваяваць за Украіну са зброяй у руках

Толькі ва ўкраінскім добраахвотніцкім батальёне "Данбас" служылі каля 15 беларусаў, а цяпер іх можа быць і больш. Яны ваююць з прарасійскімі баевікамі ва ўсходніх абласцях Украіны.

Юрый Луцэнка лічыць, што замежнікі не павінны змагацца за Украіну са зброяй у руках і рызыкаваць сваім жыццём.

"Я думаю, што ў вайсковых падраздзяленнях павінны служыць украінскія грамадзяне. Мы не можам сабе дазволіць назіраць за тым, як грамадзяне іншых краін будуць рызыкаваць сваім жыццём за нашу незалежнасць... Акрамя службы са зброяй у руках існуюць іншыя спосабы дапамагчы ўкраінскаму войску... Дапамога беларусаў, якую мы вельмі адчувалі на Майдане, павінна быць прадастаўлена жадаючымі ў форме немілітарнай", - кажа Луцэнка.

Юрый Луцэнка ўдакладняе: у тылавой службе, гаспадарчай, разведвальнай. Ён перакананы, што незалежнасць краіны павінна штосьці значыць для кожнага ўкраінца, і яны павінны за яе змагацца.