Вось незадача: на цырымоніі адкрыцця хакейнага чэмпіянату Лукашэнку адключылі мікрафон

«Не буду хаваць, нам давялося пераадолець нямала складанасцяў і шантаж, палітычны ціск з боку пэўных сіл, якія прадузята ставяцца да Беларусі. На шчасце, перамог здаровы сэнс і павага да спартыўных каштоўнасцяў. У складзе наймацнейшых хакейных каманд свету да нас прыехалі гульцы, якія з'яўляюцца легендамі і зоркамі сусветнай велічыні…»

На гэтых словах на «Мінск-Арэне» выключылі святло, знік і гук. Словы Лукашэнкі пра шантаж на англійскую мову так і не пераклалі, піша "Наша ніва".

Неўзабаве электрычнасць запрацавала, але замест мікрафона Лукашэнкі ўключылася музыка.

Кіраўнік Беларусі нешта казаў без мікрафона, а пасля, паказваючы рукой, перадаў слова кіраўніку сусветнай хакейнай федэрацыі. Раптам гук запрацаваў, і Лукашэнка зноў пачаў сваю прамову.