Партнёраў “Маладога фронта” з Нарвегіі не пусцілі ў Беларусь

Лідэрам KrFU (партнёрскай арганізацыі “Маладога Фронту”) Эмілю Эрстад (Emil André Erstad) і Ліне Нордхаўг (Line Nordhaug) 8 мая беларускія ўлады адмовілі ва ўездзе ў Беларусь. Як мяркуюць маладыя людзі, яны знаходзяцца ў неафіцыйным чорным спісе, паведамляе mfront.net.

У цягніку з Літвы ў Беларусь лідэры KrFU былі спыненыя памежнікамі. “Мы не атрымалі ніякага апраўдання, але нас высадзілі з цягніка і пасадзілі на іншы цягнік назад у Вільню ў Літву”, – кажа Эміль.

Лідэры KrFU набылі квіткі на адну з гульняў чэмпіянату па хакеі, што прадугледжвала бесперашкоднае атрыманне ўязной візы ў Беларусь. Як раней паведамлялася, любы заўзятар атрымае бясплатную візу ў Беларусь пры наяўнасці квітка на гульні чэмпіянату.

Эміль таксама апошнім разам спрабаваў уехаць у Беларусь у студзені 2012 года, і тады яму было адмоўлена. Яны звязваюць гэта з супрацоўніцтвам з “Маладым Фронтам” і партыяй БХД.

За апошнія дні каляя 30 актывістаў апазіцыі кінуты ў турмы, дэпартаваны з МІнска шведскі праваабаронца Марцін Угла.