Палітвязень Уладзь Яроменак выйшаў на волю

Личности

Ён адбываў трохмесячны арышт за парушэнне рэжыму прэвентыўнага нагляду.

Уладзя сустракалі цяжарная жонка Валянціна, сябры Маладога фронту, журналісты.

Уладзь зазначыў "Радыё Свабода" па выхадзе з турмы, што адміністрацыя да яго ставілася нармальна, былі зафіксаваныя два парушэнні, але ў штрафны ізалятар яго не накіроўвалі.

На пытанне, ці будзе працягваць палітычную дзейнасць Уладзь не адказаў, зазначыўшы, што будзе вырашаць гэтае пытанне з сям’ёю, але сваіх палітычных перакананняў ён не змяніў.

Уладзь у курсе падзеяў ва Ўкраіне, але ведае навіны адтуль з тыднёвым запазненнем, у прыватнасці ён ў курсе, што рэжым Януковіча павалены.

Яроменак падзякаваў усім, хто пісаў яму, ён атрымліваў сотні лістоў з волі, а таксама незалежным газетам "Новы час" і "Свободные новости", якія падпісалі яго на свае выданні.

У жніўні мінулага году суд Першамайскага раёну Мінску пакараў актывіста трыма месяцамі арышту за парушэнне правілаў прэвентыўнага нагляду. 11 снежня Яроменак быў узяты пад варту.

Уладзіміру Яроменку па крымінальнай справе аб масавых беспарадках у Менску 19 снежня 2010 года прысудзілі тры гады зняволення ў калоніі ўзмоцненага рэжыму. У жніўні 2011 году яго вызвалілі на падставе прэзідэнцкага ўказу аб памілаванні. Над Яроменкам устанавілі прэвентыўны нагляд. 27 красавіка 2012 года яго асудзілі на сем сутак адміністрацыйнага арышту нібыта за дробнае хуліганства, а 24 студзеня 2013 года — на 12 сутак арышту за парушэнне ўмоў прэвентыўнага нагляду.

Паводле праваабаронцаў, прэвентыўны нагляд прымяняецца беларускімі ўладамі супраць былых палітзняволеных, каб кантраляваць іх дзеянні і прымусіць адмовіцца ад актыўнага ўдзелу ў грамадскім жыцці.