Мінск развітаўся з народным мастаком Гаўрылам Вашчанка

Вядомы беларускі мастак памёр 14 лютага. Сёння ў Палацы мастацтваў у Мінску з ім развіталіся калегі і прыхільнікі яго творчасці.

Старшыня Беларускага саюза мастакоў Рыгор Сітніца ў інтэрв'ю БелаПАН сказаў, што "сёння мы развітваемся з вялікім нацыянальным мастаком".

"Для мяне гэты чалавек быў і застаецца ўвасабленнем сапраўднага служэння сваёй радзіме, велізарнага інтэлекту, высокай культуры, глыбіннай духоўнасці і абсалютнага яднання з нашай беларускай традыцыяй ва ўсіх яе праявах", — сказаў ён.

"Безумоўна, гэта вялікая страта для нас, аднак мы не губляем мастака. Сыходзіць чалавек, але застаецца вялікі мастак, які паслужыў сваёй радзіме як ніхто іншы. Гэты прыклад найвялікшага служэння нашай культуры ўжо сёння ставіць Гаўрылу Вашчанку ў шэраг самых выбітных сыноў Беларусі", — адзначыў Сітніца.

Знакаміты жывапісец, народны мастак Беларусі Гаўрыла Вашчанка, якому было 85 гадоў, памёр у ноч на 14 лютага ў Мінску.

Гаўрыла Харытонавіч Вашчанка нарадзіўся 20 чэрвеня 1928 года ў вёсцы Чыкалавічы Брагінскага раёна Гомельскай вобласці. У 1948 годзе скончыў Кіеўскае вучылішча прыкладных мастацтваў (цяпер — Кіеўскі дзяржаўны інстытут дэкаратыўна-прыкладнага мастацтва і дызайну імя Міхаіла Байчука), у 1955 годзе — Львоўскі дзяржаўны інстытут дэкаратыўнага і прыкладнога мастацтва (цяпер — Львоўская нацыянальная акадэмія мастацтваў). У 1955—1960 гадах выкладаў у Рэспубліканскім мастацкім вучылішчы Кішынёва (цяперашні Рэспубліканскі каледж выяўленчага мастацтва імя Аляксандра Плэмэдзялэ).

З 1961 па 1997 год Гаўрыла Вашчанка выкладаў у Беларускім дзяржаўным тэатральна-мастацкім інстытуце (цяпер — Беларуская дзяржаўная акадэмія мастацтваў). Кіраваў майстэрняй пры кафедры жывапісу ў 1966—1975 гадах. У 1975 годзе на мастацкім факультэце была створана кафедра манументальна-дэкаратыўнага мастацтва, загадчыкам якой стаў Вашчанка. Гэту пасаду ён займаў да 1995 года. Званне дацэнта насіў з 1965 года, у 1980-м стаў прафесарам.