Пісьменніца Святлана Алексіевіч прэзентавала кнігу "Час сэканд-хэнд"

На міжнароднай кніжнай выставе, што зараз праходзіць у Мінску, адной з асноўных падзеяў стала прэзентацыя кнігі Святланы Алексіевіч «Час сэканд-хэнд». Прэзентацыя мусіла адбыцца на стэндзе «Белкнігі».

Рэч у тым, што вышэйузгаданы стэнд – невялікі лабірынт, які сканчваецца пакойчыкам болей чым сціплых памераў. Аматараў Алексіевіч прыйшло багата – трапіць унутр, да пісьменніцы, змаглі літаральна трыццаць чалавек, - піша "Наша Ніва".

«Асцярожна, зараз выдавіце шкло ў стэндзе», — раз-пораз гучыць у даўцы. – «Гэта яны спецыяльна зрабілі, каб мала хто трапіў».

У выніку чарга расцягваецца на некалькі метраў, яе хвост знаходзіцца ў праходзе паміж стэндамі. Пачуць нешта папросту немагчыма. Алексіевіч з цяжкасцю прабіраецца на сваё месца, і прэзентацыя пачынаецца. Адначасова ў цэнтры Белэкспа пачынае выступаць ансамбль народнай песні і пляскі.

Некаторыя прыхільнікі спадарыні Святланы адпраўляюцца на другі паверх, аднак гэта не дапамагае – мікрафон у пісьменніцы слабы. Да хваста чаргі падыходзяць рэдактары «Звязды» і «Савецкай Белорусіі» Алесь Карлюкевіч і Павел Якубовіч.

«Тут што, у парадку жывой чаргі?» – цікавіцца Якубовіч. Яму адказваюць, што не – тут каму як пашанцуе. Адначасова на другім паверсе можна ўбачыць паўпустую вялікую залю, дзе праходзіць канферэнцыя па сямейных каштоўнасцях, у межах якой нехта спявае рускую народную песню «Валенкі».

Тым не менш, прыхільнікі Алексівіч не разыходзяцца ў спадзяванні атрымаць аўтограф пасля прэзентацыі – чорна-зялёны том «Час сэканд-хэнд» і перавыданне старых кніг Алексіевіч сёлета карыстаюцца вялікім попытам.