Сумныя вынікі аптымізацыі "Белпошты" на Магілёўшчыне

Гэта адбылося з ініцыятывы Магілёўскага філіяла РУП “Белпошта” ў межах “аптымізацыі дзейнасці арганізацыі”.

Чыноўнікі абяцалі, што на змену стацыянарным прыйдуць перасоўныя аддзяленні, абслугоўваць у якіх будуць не горш, чым у стацыянарных, і што выбар сервісных паслуг застанецца нязменным.

Між тым, ужо першыя тыдні працы паштавікоў у новых умовах выклікалі шматлікія нараканні вяскоўцаў, паведамляе служба маніторынгу Беларускай асацыяцыі журналістаў.

У Бялыніцкім раёне Магілёўскай вобласці ў межах аптымізацыі былі ліквідаваныя пяць паштовых аддзяленняў, якія размяшчаліся ў вёсках Ермалавічы, Лебедзянка, Лямніца, Стараселле і Эсьмоны.

Як паведамляе раённая газета “Зара над Друццю”, у рэдакцыю пастаянна тэлефануюць яе падпісчыкі, паведамляючы, што не атрымліваюць раёнку і іншыя газеты.

Чытачы скардзяцца, што аўтапошта не прытрымліваецца графіку працы і можа прыехаць і ў 11, і ў 16 гадзін, а людзі вымушаныя чакаць на моцным марозе. Людзі не могуць своечасова атрымаць пенсіі, аплаціць камунальныя плацяжы, нарэшце – прачытаць ужо аплачаную газету.