Мітрапаліт Тадэвуш Кандрусевіч ушанаваў Дары Трох Каралёў

Мітрапаліт нагадаў, што пра Дары Трох Каралёў гаворыцца ў Новым Запавеце, і гэта агульнахрысціянская святыня. “Яны проста захоўваюцца Праваслаўнай Царквой, але гэта багацце ўсяго хрысціянства. І дзякуй Праваслаўнай Царкве за тое, што яна гэта захавала”, - сказаў арцыпастыр.

Арцыбіскуп адзначыў той факт, што многія прыходзяць пакланіцца Дарам разам з дзецьмі: “Бацькі хочуць даверыць сваё дзіця Богу”.

Мітрапаліт нагадаў, што калі ў 2013 годзе ў Беларусь даставілі крыж св. апостала Андрэя, ён таксама пакланіўся гэтай святыні. “Я таксама бачыў там у чарзе католікаў”, - дадаў іерарх і звярнуў увагу на добрыя адносіны з Праваслаўнай Царквой, якія існуюць у Беларусі.

Дары Трох Каралёў выстаўлены для пакланення ў царкве пры Доме міласэрнасці з 18 па 23 студзеня з 8.00 да 22.00. 24 студзеня з раніцы доступ да Дароў будзе спынены, у гэты дзень святыня скіруецца ў Кіеў, нагадвае партал Рыма-Каталіцкага Касцёлу ў Беларусі.

Гэта адны з нямногіх рэліквій, звязаныя з зямным жыццём Хрыста, якія захаваліся да нашых дзён. У адпаведнасці з паданнем да IV ст. Дары Трох Каралёў захоўваліся ў Ерузалеме, адкуль былі перанесены ў Канстанцінопаль, а пасля на Афон, дзе знаходзяцца да сённяшняга часу. Святыня ўяўляе сабой дары, якія мудрацы з Усходу прынеслі нованароджанаму Езусу. Золата захавалася ў выглядзе 28 невялікіх падвесак рознай формы, упрыгожаных арнаментам. Да кожнай з гэтых залатых пласцін на сярэбранай нітцы прымацаваны бусіны, якія складаюцца з сумесі кадзіла і міры.