Тарашкевіца і „Менск“ упершыню з’явіліся на беларускіх грашах

Яшчэ 21 лістапада 2013 года Нацыянальны банк выпусціў манеты двух наміналаў: срэбную 20 Br (33,62 г) і медна-нікелевую 1 Br (19,5 г). Выявы на іх аднолькавыя, прысвечаныя слуцкім паясам. На рэверсе гэта стылізаваная выява вокладкі каталога з тэкстам: “Каталёг выстаўкі слуцкіх паясоў Беларускага дзяржаўнага музэю. Красавік 1927 г. г. Менск”.

Сайт Нацыянальнага банка паведамляе, што на рэверсе манеты таксама выяўлены фрагмент поясу з калекцыі Івана Луцкевіча, які быў паказаны Максіму Багдановічу, пасля чаго ён напісаў верш „Слуцкія ткачыхі“, піша Вінцук Вячорка ў сваім блогу.

На аверсе, як паведамляе Нацыянальны банк, адлюстраваны ўзор двухбаковага поясу, які выраблены на Слуцкай мануфактуры і знаходзіцца ў калекцыі Літаратурнага музея Максіма Багдановіча.

Яшчэ адна пара манетаў серыі „Слуцкія паясы“ мае на рэверсе надпісы беларускаю лацінкаю — SŁUCK, лацінскаю моваю — IOANNES MADZARSKI ME FECIT SŁUCIÆ, старабеларускаю кірыліцаю — ЛЕО МАЖАРСКІИ ВЪ ГРДѢ СЛУЦКѢ. Усе ўзятыя з тканых пазнакаў на паясах.

Аўтар абедзвюх манет - С. Някрасава. Манеты бітыя на Віленскай мынцы.