Мінабароны забараніла салдатам карыстацца мабільнікамі на службе

«Выкарыстоўваць асабістыя сродкі сувязі вайскоўцы тэрміновай ваеннай службы, рэзэрвісты, курсанты ваенных навучальных устаноў і вайсковаабавязаныя, прызваныя на зборы, могуць толькі ў час, вызначаны для асабістых патрэбаў, у выхадны дзень, пры накіраваньні да месца службы, лячэння і назад, знаходжанні па-за вайсковай часткай і на адпачынку, а таксама ў звальненні або водпуску».

Знаходзіцца з тэлефонам на аб’ектах інфарматызацыі салдатам строга забараняецца. У гэтым выпадку тэлефон ён здаецца на часовае захоўванне і знаходзіцца ў спецыяльна абсталяваным месцы, пра што робіцца адпаведны запіс у кнізе прыёму сродкаў сувязі.

Тлумачэнні зьявіліся ў сувязі з тым, што на пачатку года спэцназавец самавольна пакінуў 5-ю асобную брыгаду спецыяльнага прызначэння ў Мар’інай Горцы з-за таго, што яму забаранілі карыстацца планшэтам падчас знаходжання ў варце.

Пра тое, як на справе выконваюцца інструкцыі Мінабароны пра мабільныя тэлефоны, Радыё Свабода распавёў адзін з былых вайскоўцаў Павал:

«Я служыў у войску ў 2010-2011 гадах. Тэлефонамі карысталіся ў нас усе. І малодшыя і старэйшыя прызывы. Праўда, дазвол быў не афіцыйны, але кіраўніцтва часткі збольшага на наяўнасць тэлефонаў заплюшчвала вочы. Часам былі загады, пасля нейкіх „залётаў“ канфіскаваць ва ўсіх тэлефоны і выдаваць толькі па выходным. Але звычайна такія загады трымаліся цягам тыдня, а потым усім зноў вярталі тэлефоны. Таму ўсе салдаты звычайна вечарамі ці начамі пад коўдраю пасля адбою і музыку з тэлефонаў у навушніках слухалі, і сядзелі ў сацсетках, і размаўлялі.

Ведаю, што тады напрыклад у войску МУС, у адрозненні ад Мінабароны было ўсё больш строга. Там за тэлефон нават на гаўпвахту саджалі. Але у лістападзе мой брат вярнуўся з войска, служыў у войску МУС, то казаў што і там цяпер у вольны час дазваляюць карыстацца тэлефонам і мець яго».