Нельга ставіць у адзін шэраг хакеістаў-аматараў і алімпійскіх чэмпіёнаў

Хакеісты-ветэраны-аматары з прэзідэнцкай каманды атрымалі званні заслужаных майстроў спорту Рэспублікі Беларусь — і сапраўдным спартоўцам такая навіна здалася смешнай.

Бо гэта як чалавеку, што часам укручвае дома лямпачкі, прысвоіць званне заслужанага энергетыка.

Як скнару-цешчу ўзнагародзіць званнем заслужанага эканаміста.

Як дзеяча, які ўмее напісаць на плоце вядомае слова з трох літар, назваць пісьменнікам.

Гэта смешна, таму што ў савецкі час «заслужаных» давалі ТОЛЬКІ алімпійскім чэмпіёнам!

Уладзімір Парфяновіч — заслужаны майстар спорту. Трохразовы алімпійскі чэмпіён, адзіны ў свеце байдарачнік, які выйграў тры залатыя медалі ў рамках адных Алімпійскіх гульняў.

Кацярына Карстэн — заслужаны майстар спорту. Першая і адзіная двухразовая алімпійская чэмпіёнка ў гісторыі незалежнай Беларусі, шматразовая чэмпіёнка свету ў веславанні на адзіночцы.

Віталь Шчэрба — заслужаны майстар спорту. Знакаміты гімнаст, шасціразовы алімпійскі чэмпіён, адзіны ў гісторыі неплывец, які выйграў шэсць залатых узнагарод на адных Гульнях, адзін з найлепшых гімнастаў усіх часоў, адзіны мужчына, які рабіўся чэмпіёнам свету ва ўсіх васьмі дысцыплінах — асабістым і камандным першынствах, а таксама на ўсіх шасці снарадах…

Не ведаю, якое зацьменне павіннае здарыцца, каб аднолькава ацэньваць заслугі перад спортам Віталя Шчэрбы, Сашы Герасімені, Дар'і Домрачавай, Сяргея Мартынава і гаспадара будаўнічых кампаній Паўла Белага, - перадае словы Святланы Калінкінай "Наша Ніва".

Не ведаю, чым трэба кіравацца, каб у выніку паставіць у адзін шэраг спартоўцаў Аляксандра Глеба, Вікторыю Азаранка, Макса Мірнага і нейкіх Генадзя Савілава і Сяргея Задзяленава.

Урэшце, гэта цалкам супярэчыць беларускаму закону аб дзяржаўных узнагародах, які элементарна не дазваляе прысвойваць ганаровыя званні за траплянне ў пісуар або ў плявальніцу.

Так, артыкул 59 гэтага закона абвяшчае: «Ганаровае званне «Заслужаны майстар спорту Рэспублікі Беларусь» прысвойваецца спартоўцам, у тым ліку спартоўцам-інвалідам, за дасягненне высокіх вынікаў на Алімпійскіх, Паралімпійскіх і Сусветных гульнях, чэмпіянатах, першынствах і Кубках свету і Еўропы».