Сынам Вольгі Карач заняліся органы апекі

Лідэр кампаніі "Наш Дом" Вольга Карач разам з мужам і сынам Святаславам, які нарадзіўся 3 снежня, днямі прыехалі на радзіму, у Віцебск. Праз тыдзень пасля прыезду ў кватэру да бацькоў Вольгі прыйшла праверка.

Вoльга Карач расказала "Свабодзе", што ў кватэру, дзе яна прапісаная, з’явіліся прадстаўнікі органаў апекі Кастрычніцкага раёна Віцебска і раённай камісіі па справах непаўналетніх.

"Мы прыехалі ў Віцебск 7 студзеня. Я займалася зборам дакументаў, каб аформіць дэкрэтны адпачынак. Але я мусіла ад’ехаць, і якраз у гэты дзень да маёй маці прыйшлі з праверкай. Пыталіся пра дзіўныя, на мой погляд, рэчы: ці ёсць у сына дзіцячы вазок, або — калі мы набывалі яму адзенне і цацкі: да родаў ці пасля. На гэтыя пытанні была вымушана адказваць бабуля. Сваё з’яўленне інспектары патлумачылі тым, што ім трэба скласці акт пра жыллёвыя ўмовы дзіцяці. Урэшце напісалі, што яны добрыя. Праўда, копію акту не пакінулі. І я абураная самім стаўленнем да нашай сям’і! Я ведаю, што падобныя праверкі праводзяцца, калі дзіця знаходзіцца ў сацыяльна небяспечным становішчы. Хіба мой сын — у такім становішчы? Што за нездаровая цікаўнасць да мяне і майго сына?"

Спадарыня Вольга зазначыла, што ўвогуле не разумее ініцыятывы правяраць жыллёвыя ўмовы дзіцяці, якое на сённяшні дзень яшчэ нідзе не прапісанае. Яны з мужам яшчэ вырашаюць, дзе прапісаць малога — з бацькам ці з маці. Маленькага Святаслава яшчэ не паставілі на ўлік у дзіцячай паліклініцы, працягвае Вольга Карач:

"Я пайшла ў паліклініку з дакументамі, каб завесці картку на сына. Але па ўмовах паліклінікі карткі дзяцей захоўваюцца ў іх. Я ведаю выпадкі, калі карткі проста гублялі, і таму папрасіла, каб картка або захоўвалася ў нас, або каб мне назвалі асобу, якая персанальна будзе несці адказнасць за захаванасць карткі майго дзіцяці. Мне такую асобу не назвалі, і ў паліклініцы на ўлік Святаслава так і не паставілі. Увогуле яго няма на ўліку ў ніводнай беларускай структуры. У мяне не аформлены дэкрэтны адпачынак. Дык адкуль тады праверкі? Адкуль стала вядома, што мы ўвогуле ў Віцебску? Я лічу, што гэта ціск на мяне і на маю сям’ю. Дарэчы, не паспела я сюды з’явіцца, як да мяне з’явіліся пытанні і ў падатковай інспекцыі. Ва ўсіх пытанні толькі да мяне. І ніхто з дзяржаўных службоўцаў так і не даў мне ўцямнага адказу, прыкладам, як аформіць дэкрэтны адпачынак".

Сыну Вольгі Карач Святаславу яшчэ толькі паўтара месяца. Маці апавяла, што ён нарадзіўся ва Украіне, у Харкаве. Але ён грамадзянін Беларусі, як і ягоныя бацькі. І гэта, лічыць маці, абуральна, калі жыццё маленькага чалавека пачынаецца з ціску — пакуль бюракратычнага, але, перакананая Вольга Карач, з палітычных прычын.

У навукова-метадычным кабінеце аддзелу адукацыі, спорту і турызму адміністрацыі Кастрычніцкага раёна Віцебска сказалі, што іх супрацоўнікі сапраўды праводзяць праверкі па хатах тады, калі прыходзіць інфармацыя пра тое, што дзеці гадуюцца ў неспрыяльных умовах:

"Да нас сапраўды паступаюць сігналы пра праблемныя сем’і. Па такіх адрасах выходзяць спецыялісты і робяць праверку на месцах. Гэта наш абавязак, бо мы выконваем функцыю апекі непаўнагадовых. У дачыненні да Вольгі Карач такой інфармацыі не паступала. У журнале зваротаў гэтае прозвішча таксама не фігуруе", — паведаміла Радыё Свабода метадыст Аксана Аладзіна.