Улада абяцае арганізаваць грамадскае абмеркаванне рэгістрацыі інтэрнэт-СМІ

“Мінінформу даручана вынесці пытанне аб парадку рэгістрацыі і рэгулявання дзейнасці СМІ, якія распаўсюджваюцца праз глабальную сетку Інтэрнэт, на абмеркаванне з удзелам грамадства, зацікаўленых органаў і арганізацый, а таксама прыцягнуць да працы над названмі прапановамі аб змяненні заканадаўства прадстаўнікоў журналісцкіх арганізацый і інтэрнэт-супольнасці”, – гаворыцца ў лісце за подпісам Усевалада Янчэўскага.

Прэс-служба БАЖ нагадвае, што 11 снежня Беларуская асацыяцыя журналістаў звярнулася ў Міністэрства інфармацыі Беларусі з просьбай паведаміць, на якой стадыі знаходзіцца праца над праектам зменаў у заканадаўства аб СМІ і, калі ён падрыхтаваны, перадаць яго журналісцкай супольнасці для азнаямлення.

Апроч гэтага, журналісцкая арганізацыя прасіла ўключыць у склад працоўнай групы па стварэнні згаданага прававога акта экспертаў ГА "Беларуская асацыяцыя журналістаў" і прадстаўнікоў інтэрнэт-супольнасці, а таксама правесці шырокае грамадскае абмеркаванне планаваных зменаў у заканадаўства. Адказу з Міністэрства інфармацыі ГА “БАЖ” пакуль не атрымала.

Паралельна з гэтым ГА “БАЖ” звярнулася да начальніка Галоўнага ідэалагічнага ўпраўлення прэзідэнцкай адміністрацыі Усевалада Янчэўскага з просьбай садзейнічаць забеспячэнню галоснасці ў працы над прававым актам.

Журналісцкая арганізацыя таксама заклікала Янчэўскага звярнуцца па экспертную дапамогу да Прадстаўніка АБСЕ па пытаннях свабоды сродкаў масавай інфармацыі і ў іншыя структуры, якія валодаюць высокім экспертным патэнцыялам.

Нагадаем, што 19 лістапада намеснік міністра інфармацыі Беларусі Дзмітрый Шадко на ўрадавай нарадзе паведаміў пра распрацоўку зменаў у Закон аб СМІ, якія “з мэтай арганізацыі ў інтэрнэце эфектыўнага процідзеяння негатыўным сацыяльным з'явам” могуць абавязаць інтэрнэт-выданні зарэгістравацца ў якасці сродкаў масавай інфармацыі.

А 10 снежня ў лісце супрацоўніку брытанскай арганізацыі “Індэкс цэнзуры” Андрэю Аляксандраву Дзмітрый Шадко паведаміў, што Міністэрства інфармацы вядзе дэтальнае вывучэнне гэтага пытання з мэтай выпрацоўкі аптымальных рашэнняў для ўнясення адпаведных прапановаў у Савет Міністраў.