Актывіст аштрафаваны за выказванні супраць п'янства

Каардынатар грамадзянскай кампаніі «Хопіць піць - трэба жыць» Дзмітрый Карашкоў ужо звяртаўся ў мінулым годзе ў гарвыканкам, каб атрымаць дазвол на правядзенне антыалкагольнага пікету. Улада не дазволіла яму правесці мерапрыемства.

У лістападзе Карашкоў больш не пытаўся дазволу і выйшаў да аблвыканкама з расцяжкай з надпісам «Спыніце продаж алкаголю каля школ!». За гэта на яго склалі адміністрацыйны пратакол, - перадае "Наша Ніва".

Суд Цэнтральнага раёна Гомеля 9 студзеня прызнаў Дзмітрыя Карашкова вінаватым па артыкуле 23.34 КаАП (парушэнне парадку правядзення масавага мерапрыемства) і назначыў яму штраф у 1,3 млн. рублёў.

Актывіст адзначае, што звяртацца ў гарвыканкам за дазволам бессэнсоўна. А права на правядзенне мірных сходаў гарантавана грамадзянам Канстытуцыяй. Таму ён будзе звяртацца ў вышэйшыя інстанцыі.

«Я буду абскарджваць рашэнне суда і працягваць сваю дзейнасць. Праблема алкагалізацыі стаіць востра, улады не могуць заплюшчваць не яе вочы. Разам з тым яны не дапускаюць актыўнасці грамадзян, выказвання пратэсту, таму рашэнне суда было для мяне чаканым», - сказаў Карашкоў.