Мітрапаліты Філарэт і Павел правядуць супольную літургію

У нядзелю, 5 студзеня, ганаровы Патрыяршы Экзарх усяе Беларусі Мітрапаліт Філарэт і Патрыяршы Экзарх усяе Беларусі Мітрапаліт Мінскі і Слуцкі Павел правядуць супольную літургію ў Свята-Духавым катэдральным саборы ў Мінску. Пра гэта Радыё Свабода паведаміў прадстаўнік прэсавай службы Беларускай праваслаўнай царквы, айцец Сяргей Шульпін.

"Удзел у літургіі прымуць таксама біскупы Беларускай праваслаўнай царквы і духавенства. На завяршэнне гэтай службы мітрапаліт Філарэт прадставіць беларускаму народу ўладыку Паўла", — паведаміў а. Сяргей.

Хто будзе прысутнічаць на ўрачыстай літургіі ад прадстаўнікоў дзяржаўнай улады Беларусі, а. Сяргей не ўдакладняе. У прэсавай службе БПЦ таксама не паведамляюць, якім будзе расклад першых дзён працы мітрапаліта Паўла, аднак вядома, што ў сярэдзіне студзеня ён правядзе прэсавую канферэнцыю для журналістаў свецкіх сродкаў масавай інфармацыі.