Ірына Дубянецкая: Беларуская рэлігійная падвоенасць – наша станоўчая адметнасць

Звыклая для беларуса сітуацыя, калі сусед адзначае Каляды 24-25 снежня, а 6-7 студзеня віншуе іншага суседа з ягоным Святам Хрыстовага Нараджэння. Больш за тое, вельмі часта рэлігійныя святы адзначаюць два разы ў адной і той жа сям'і.

На думку доктара тэалогіі Ірыны Дубянецкай, "гэта сапраўды ўнікальная сітуацыя, мы гэтым адметныя". У размове са Службай інфармацыі "ЕўраБеларусі" яна нагадвае пра звыклую раней для беларусаў карціну якога мястэчка – амаль насупраць стаяць касцёл і праваслаўная царква, непадалёк сінагога, дзесьці і мячэт.

"Беларуская сітуацыя – ад самага пачатку полірэлігійная. Касцёл, царква, сінагогі і мячэт. Гэтага не было нідзе ў Еўропе. І гэта беларуская падвоенасць якраз злучае грамадства, хаця, на першы погляд, мусіла б раз'ядноўваць, - зазначае Ірына Дубянецкая. - Можна сказаць, што ўся краіна святкуе разам, існуе мяшанка ў сем'ях, калі муж, напрыклад, каталік, жонка – праваслаўная, і сям'я святкуе і тыя, і тыя святы. Насуперак усяму гэта аб'ядноўвае, а не раз'ядноўвае беларусаў".

"І на чужы Сьвяты не кідай у ніты", - гэтую прымаўку я знайшла ў кнізе Пётры Садоўскага. Яна выдатна адлюстроўвае стаўленне беларусаў да гэтага далікатнага пытання. Не працуй на чужое свята, шануй суседзяў, якія іншай веры. Вось дзе сапраўдная талерантнасць. Пра беларусаў часта кажуць, што яны талерантныя – і з гэтым я не пагаджуся. Але вось у справе веравызнання – так, сапраўды, рэлігійная талерантнасць у беларускага народа ёсць ад даўніх часоў. І гэта цалкам адпавядае словам Хрыста: "Любіце адзін аднаго" і "Не бойцеся", запаветам, якія нам вельмі патрэбныя ў гэты час", - кажа Ірына Дубянецкая.