Арцыбіскуп Тадэвуш Кандрусевіч: Божае Нараджэнне — гэта сучаснасць нашага дня

- Мы ўжо так моцна прызвычаіліся, што Свята Божага Нараджэння ўвайшло ў наша жыццё - у Беларусі ж гэта не толькі рэлігійнае, але і дзяржаўнае свята. Аднак, трэба паглядзець на тое, ці сапраўды мы заўсёды ведаем сутнасць гэтага свята. Мы занятыя прыгатаваннем нашых памяшканняў да свята, падарункамі, ялінкамі, яслямі і гэтак далей. Але сутнасць гэтага Свята ў тым, каб Езус нарадзіўся сваёй ласкай у нашых сэрцах і нашых душах. Бо інакш мы рызыкуем разам з вадою з балеі выкінуць і дзіця. А яно павінна быць там. І таксама Езус тут павінен быць. Ён павінен прыйсці ў нашыя сэрцы сваёю ласкай, ён павінен там нарадзіцца.

Божае нараджэнне – гэта не толькі нейкая гістарычная падзея, якая адбылася ў Бэтлееме больш за дзве тысячы гадоў таму, але гэта сучаснасць нашага дня. Гэта сучаснасць нашага жыцця, гэта рэальнасць нашага жыцця. І таму я жадаю ўсім Вам, дарагія браты і сёстры, услухацца ў стук Касцёла - праз яго навучанне – у стук у нашы сэрцы. Каб не адбылося так, як было ў Бэтлееме, калі не было месца ў гасцініцы для Езуса. Каб мы адчынілі свае сэрцы, свае душы для Яго, каб Ён там нарадзіўся, каб яны сталіся Бэтлеемам нашага часу. І каб Езус прынёс гэты чаканы супакой у Свет, у нашае грамадства.

Святы айцец Францішак, звяртаючыся да ўсяго Свету, у сваім першым Пасланні на Дзень міру, які будзе адзначацца 1 студзеня, кажа, што Братэрства з'яўляецца падмуркам і шляхам да міру. Менавіта аб гэтым Братэрстве нагадвае Езус Хрыстус. Для Яго ўсе – браты і сёстры. Таму будзем гэтымі братамі і сёстрамі паміж сабою праз Езуса Хрыста.

Радасных, вясёлых Святаў Божага Нараджэння – усім, хто сёння яго святкуе. Таксама віншую братоў і сясцёр Праваслаўных, якія рыхтуюцца да гэтага ж Свята! І шчаслівага Новага году!