Грамадскага актывіста Алеся Макаева пасадзілі на 5 сутак за ўшанаванне слуцкіх паўстанцаў

Макаеў быў затрыманы 24 лістапада ў вёсцы Грозаў Капыльскага раёна падчас мерапрыемстваў з нагоды гадавіны Слуцкага збройнага чыну 1920 года — за тое, што ўзняў бел-чырвона-белы сцяг.

Актывіста судзілі паводле арт. 23.34 КоАП (парушэнне парадку арганізацыі ці правядзення масавых мерапрыемстваў), паведамляе "Наша Ніва". Паводле слоў актывіста, сёлета ў яго было "шмат арыштаў", а пратакол складзены паўторна на працягу года.

Летась пасля акцыі з нагоды гадавіны Слуцкага збройнага чыну Макаеў быў аштрафаваны на 5 млн рублёў, аднак пакуль не аплаціў яго, бо абскарджвае прысуд у Вярхоўным судзе.