Актывіста БХД з Брэста за палітычны перфоманс змясцілі ў вар'ятню

Актывіста Беларускай Хрысціянскай дэмакратыі Алеся Чаркашына змясцілі ў Брэсцкую псіхіятрычную лякарню. Аб гэтым паведаміў мясцовы каардынатар аргкамітэту БХД Зміцер Шурхай:

- Я датэлефанаваўся ў дзяжурную частку Ленінскага РАУС Брэста, дзе мне паведамілі, што суду пакуль ня будзе, таму што Чаркашыным зацікавіліся медыкі з псіхіятрычнай лякарні. Маўляў, сказалі, што "наш пацыент".

Алеся павезлі на псіхіятрычны агляд, які можа цягнуцца да трох дзён. І толькі ў тым выпадку, калі Чаркашына прызнаюць нармальным, будзе складацца пратакол аб несанкцыянаванай акцыі. Лічу гэта правакацыяй з боку КДБ, таму што супрацоўнікі міліцыі наўрад ці выклікалі б гэтых урачоў. Гэта ўсё зроблена дзеля таго, каб быў псіхалагічны ціск на Алеся і каб яго дыскрэдытаваць. Магу заявіць, што Алесь Чаркашын нармальны, здаровы і адэкватны чалавек. Акцыя, вядома, была неардынарная, нетыповая. На тое ён і перфоманс.

Прэс-служба БХД нагадвае, што 15 снежня Алесь Чаркашын зладзіў перфоманс, у часе якога прамаўляў ля ганку Брэсцкага аблвыканкаму, папярэдне апрануўшыся ў адзенне "прарока", абвязаўшы рукі ланцугамі і абліўшы чырвонай фарбай.