Акцёры "Дзядоў" падтрымалі ўкраінскі народ

Спектакль "Дзяды" паводле Адама Міцкевіча, тут не паспрачаешся, прасякнуты тымі ж ідэямі, што пануюць зараз на Еўрамайдане ў Кіеве. Краіна, якую расцягваюць на кавалкі Прусія, Аўстрыя ды Расея, памкненне быць еўрапейцамі, а не ехаць пад вартай у кібітках у Сібір, спробы студэнтаў супрацьстаяць Імперыі...

У Доме прафсаюзаў зноў паказалі "Дзядоў", спектакль Рамунэ Кудзманайтэ, пастаноўку, якую пасля прэм'еры ўвесну 2013 года назвалі ў Літве і ў нас сенсацыяй тэатральнай культуры, лепшым у Беларусі, новай легендай.

Увечары 8 снежня, пасля выхаду да гледачоў усёй трупы зорка спектаклю, акцёр Купалаўскага Раман Падаляка нагадаў гледачам пра падзеі ў Кіеве (там якраз пачынаўся першы штурм Еўрамайдану). Акцёр ад імя ўсё трупы выказаў словы падтрымкі ўкраінскаму народу, які "перажывае зараз цяжкія хвіліны".

Акрамя нацыянальна арыентаванай публікі, што цалкам зразумела, на "Дзядах" быў заўважаны былы міністр замежных спраў Сяргей Мартынаў (2003-2012), менавіта пры ім Беларусь далучылася да праграмы ЕС Усходняе партнёрства, што праўда, без аніякіх поспехаў на заходнім накірунку.

Наступным разам беларусы змогуць паглядзець "Дзядоў" напрыканцы студзеня 2014 году.