Сёння хаваюць забітага ў Йемене беларуса

Гэта малодшы брат вядомага тэатральнага рэжысёра Валерыя Мазынскага – Анатоль. Ён працаваў на 140-м танкарамонтным заводзе з 1974 года, дзе быў вопытным выпрабавальнікам адрамантаваных танкаў. Да выхаду на пенсію Анатолю Яўгенавічу заставаўся адзін год.

Barysau.by ужо паведамляў аб тым, што 26 лістапада ў йеменскай сталіцы Сане баевікі абстралялі двух беларусаў на выхадзе з гатэля "Амстэрдам". Адзін з іх – Анатоль Мазынскі – загінуў на месцы, другі быў шпіталізаваны. Прэс-сакратар МЗС Андрэй Савіных неўзабаве прызнаў, што абодва барысаўцы працавалі ў арабскай краіне па афіцыйным кантракце.

Валерый Мазынскі падцвердзіў Радыё Свабода: "Так, гэта мой брат Анатоль. Яму было 60 гадоў. На нашым 140-м заводзе ён адпрацаваў, выпрабоўваў адрамантаваныя танкі. З маладосці яму гэта спадабалася, а потым уцягнуўся і адпрацаваў усё жыццё. А дзе яшчэ было зарабіць грошы? Вось і пасля сыходу на пенсію гэтым працягваў займацца".

Паводле Валерыя Мазынскага, ягоны брат быў у камандзіроўцы ў Йемене 2-3 разы, а з калегамі яны пабывалі і ў іншых краінах. У прыватнасці, Валер Мазынскі згадаў пра Сірыю.

У Анатоля Мазынскага засталася жонка, а таксама дзеці — сын і дачка.