На "Ждановічах" падатковая інспекцыя канфіскавала тавар прадпрымальнікаў

Так скончыўся канфлікт на рынку «Ждановічы». Да аднаго з прадпрымальнікаў, які гандлюе джынсамі насупраць «Дому моды-4», прыйшлі супрацоўнікі падатковай інспэкцыі і пачалі канфіскоўваць тавар.

Іншыя прадпрымальнікі, якія гандлююць па суседзтве, зачынілі свае кропкі і накіраваліся бараніць калегу. Агулам сабралася каля 200 чалавек. Падчас канфлікту нават дайшло да рукапашнай, паламалі сталы, на якіх былі раскладзеныя рэчы.

 Неўзабаве да падаткавікоў далучыліся супрацоўнікі міліцыі і АМАП. Пра падрабязнасьці інцыдэнту Радыё Свабода апавёў прадпрымальнік Вячаслаў Піліпук, сябра РГА «Перспэктыва»:

Вячаслаў Піліпук «Падаткавікі дачакаліся „перамогі“. З чатырох
павільёнаў, на якія яны „напалі“, тавар канфіскавалі з двух. Нейкія падставы ў падаткавікаў да канфіскацыі тавару былі. У прадпрымальніка, да якога прыйшлі з праверкай, на рынку 30 кропак. І падаткавікі хацелі з усіх канфіскаваць тавар. Таму супрацьстаянне вельмі яму дапамагло — толькі з двух канфіскавалі. А іншы тавар прыбраны з-пад удару».

Па словах Піліпука, супраць прадпрымальнікаў прыгналі некалькі аўтобусаў АМАПу, а таксама міліцэйскія ўазікі, аўтазак і некалькі цывільных аўтамабіляў. «Ніхто ня ўмешваўся, стаялі ўбаку. З АМАПу былі высокія досыць чыны — ад сяржантаў да падпалкоўнікаў», — кажа Піліпук.

Ён лічыць, што прадпрымальнікаў «узялі зморам» — людзі сталі разыходзіцца, каб завяршыць працоўны дзень, закрыць павільёны.

«Для падаткавікаў „Ждановічы“ — гэта ласы кавалак. На жаль, прадпрымальнікі адвыклі ад праверак, бо быў пэўны „мараторый“. Шмат хто расслабіўся, ня маюць ужо ўсіх дакумантаў. І падаткавікі пабачылі, што ёсць слабыя месцы — накінуліся, як грыфы на здабычу».

Згодна з патрабаваньнямі тэхнічнага рэгламэнту Мытнага саюзу «Пра бяспеку прадукцыі лёгкай прамысловасці» з 1 снежня прадпрымальнікам будзе забаронена прадаваць тавары, якія не маюць пацвярджэння якасці і бяспекі. З 1 лістапада пачаліся масавыя праверкі прадпрымальнікаў, якія часам суправаджаюцца канфіскаваннем тавару.