Прадпрымальнікі і падаткавікі ў «Ждановічах»: сценка на сценку

Канфлікт пачаўся 29 лістапада каля 11 гадзіны, калі да аднаго з прадпрымальнікаў, які гандлюе джынсамі насупраць "Дома моды-4", прыйшлі супрацоўнікі падатковай інспекцыі і пачалі канфіскоўваць тавар, паведамляе радыё "Свабода".

Іншыя прадпрымальнікі, якія гандлююць па суседcтве, зачынілі свае кропкі і накіраваліся бараніць калегу. Неўзабаве да падаткавікоў далучыліся супрацоўнікі міліцыі і АМАП.

"Цяпер яшчэ нічога не скончылася. Наадварот, усё разгортваецца. Нагналі АМАПу. Супрацьстаянне працягваецца, стаяць сцяна на сцяну. Стаяць прадпрымальнікі і АМАП разам з міліцыянтамі і супрацоўнікамі падатковай", — расказаў радыё "Свабода" прадпрымальнік Вячаслаў Піліпук.

Адзін з супрацоўнікаў падатковай інспекцыі паказаў прадпрымальнікам пасведчанне. "Прозвішча Дыкола, рэйдавы аддзел, Інспекцыя па падатках і зборах.
Нічога нам не патлумачылі, не адказалі на пытанне прадпрымальнікаў, чаму так адбываецца. Можа, там ёсць нейкія парушэнні, але нічога не патлумачылі. Проста прыехалі канфіскаваць тавар", — кажа Вячаслаў Піліпук.

Вячаслаў Піліпук дапускае, што такія дзеянні маглі быць вынікам нейкай праверкі, аднак здзіўляецца, чаму гэта нельга нармальна патлумачыць.