На юбілей Дзеда Мароза прыедуць 15 казачных персанажаў з розных краін

Пра гэта беларускі Дзед Мароз паведаміў на прэс-канферэнцыі ў Мінску 20 лістапада.

Святкаванне юбілею маёнтка адбудзецца ў Белавежскай пушчы 13—15 снежня. Паводле слоў Дзеда Мароза, на ўрачыстасць прыедуць расійскі Дзед Мароз з Вялікага Усцюга, Кастрамская Снягурка, татарскі Кыш Бабай, фінскі Ёулупукі, украінскі Святы Мікалай, цар Берандзей і іншыя.

"Упершыню да нас у казачны маёнтак прыедуць беларускія сябры — мой прадзед, бог зімы Зюзя Паазерскі, які жыве ў Віцебскай вобласці, Балотнік з Бярэзінскага запаведніка, і, паколькі ў сярэдзіне кастрычніка ў мяне над маёнткам зведала крушэнне ступа малодшай сястры Бабы-Ягі — Бабы-Карготы, з ёй таксама можна будзе ўбачыцца", — расказаў Дзед Мароз.

Ён таксама адзначыў, што сёлета ў маёнтак упершыню з'явіцца яго жонка Матухна Зіма і трое іх дачок — Сцюжа, Віхура і Мяцеліца, паведамляе БелаПАН.

Паводле слоў Дзеда Мароза, 13 снежня казачныя госці і іншыя наведвальнікі будуць прыбіраць галоўную ёлку маёнтка, якой сёлета спаўняецца 150 гадоў.

14 снежня свята будзе прысвечана новаму міжнароднаму турыстычнаму праекту "Казачная карта Расіі і Беларусі", у межах якога ў маёнтак будзе ўстаноўлена першая міжнародная казачная вярста, правобраз казачнай карты Расіі і Беларусі і першы казачны дарожны знак, які заклікае вадзіцеляў прачытаць верш Дзеду Марозу. Акрамя таго, у маёнтку будзе закладзена алея славы казачных персанажаў.

15 снежня адбудзецца прэзентацыя турыстычных праграм замежнымі гасцямі маёнтка, а таксама падвядзенне вынікаў конкурсу на лепшую казку, у якім узялі ўдзел каля 700 чалавек з Брэсцкай вобласці, і конкурсу на лепшы падарунак казачным гасцям свята.

Як паведаміла намеснік дырэктара РУП "Цэнтркурорт" Алена Брок, кошт аднадзённага тура для турыстаў, якія адпраўляюцца ў маёнтак дзеда Мароза з Мінска з групай, складае прыкладна 500 тысяч рублёў. Аднадзённая праграма для індывідуальных турыстаў, якія дабіраюцца ў Белавежскую пушчу на ўласным транспарце, каштуе каля 100 тысяч рублёў для дарослага наведвальніка і 90 тысяч — для дзіцяці.