Вярхоўны суд адмовіў Логвінаву ў ягонай спробе вярнуць выдавецкую ліцэнзію

У Вышэйшым гаспадарчым судзе адбыўся разгляд справы па пазове выдавецтва "Логвінаў" да Міністэрства інфармацыі. Мінінфа забрала ў выдаўца ліцэнзію. Ігар Логвінаў абскарджваў гэтае рашэнне.

Журналістаў з фота- і відэакамерамі у залу паседжанняў суда не пусціла ахова пад камандаваннем невядомага мужчыны ў цівільным, які адмовіўся назваць сябе і сваю пасаду.

Падтрымаць Ігара Логвінава прыйшлі выдатныя дзеячы грамадства і культуры Уладзімір Арлоў, Альгерд Бахарэвіч, Ігар Бабкоў, Вольга Шпарага, Павал Касцюкевіч.
"Справа, якая разглядаецца сёння, не руцінная і не шараговая, -- сказаў у судзе пісьменнік Уладзімір Арлоў. -- Гаворка ідзе пра лёс аўтарытэтнага выдавецтва. Яно працуе чатырнаццаты год. За гэты час выйшла каля 700 кніг. Выдавецтва з'яўляецца адным з лідараў па выданні мастацкай літаратуры па беларускай мове. Высокі суд, -- звярнуўся ён да суддзі, -- вашае рашэнне, якое дазволіла б працягваць выдавецтву сваю працу, было б адначасова і рашэннем у падтрымку нашай беларускай культуры".

Справу разглядала суддзя Таццяна Праташчык.

Інтарэсы Міністэрства інфармацыі ў судзе баранілі дзве спецыялісткі з юрыдычнай службы.

Суддзя адмовіла выдаўцу ў ягоным пазове, піша “Наша ніва”.

Вось як пракаментаваў Еўрарадыё рашэнне суда Ігар Логвінаў:

“Рашэнне суда мяне не здзіўляе. Больш здзіўляе пазіцыя Міністэрства інфармацыі. Справы аб экстрэмізме праходзяць перыядычна. Яны абмяжоўваюцца папярэджаннямі, альбо нейкімі больш мяккімі санкцыямі. А ў дачыненні да нас была выбраная такая жорсткая і цынічная форма. Гэта сведчыць аб стаўленні Мінінфармацыі да сваіх выдаўцоў і да нацыянальнай літаратуры ў цэлым”.