Прысуд Уладзімеру Яроменку пакінулі ў сіле

Такое рашэнне сёння ўхваліў Мінскі гарадзкі суд, які адхіліў скаргу Яроменкі на прысуд Першамайскага раённага суда.

Яроменка збіраецца абскарджваць гэтае рашэнне ў Вярхоўным судзе, але не верыць у станоўчы вынік, паведамляе Радыё Свабода.

20 жніўня Першамайскі суд Мінску прызнаў актывіста Маладога фронту Ўладзіміра Яроменку вінаватым у парушэнні правілаў прафілактычнага нагляду і асудзіў на 3 месяцы арышту ў арыштным доме.

Уладзімір Яроменак нарадзіўся ў горадзе Мёры 4 верасня 1990 года. Пасля заканчэння сярэдняй школы паступіў у Беларускі дзяржаўны ўніверсітэт інфарматыкі і радыёэлектронікі.

Удзельнік Плошчы-2010. Затрыманы супрацоўнікамі спецслужбаў на наступны дзень пасля пікету салідарнасці з палітзняволенымі каля Дому ўраду. За гэта быў асуджаны на 15 сутак арышту, які ён адбыў у Жодзінскай турме. Пасьля выхаду адтуль быў выкліканы ў якасці сведкі на допыт у КДБ, які скончыўся 7-сутачным арыштам на Акрэсціна. 28 студзеня 2011 года арыштаваны ў трэці раз, цяпер ужо як падазраваны па справе аб масавых беспарадках. Змешчаны пад варту ў СІЗА КДБ.

Яроменку было выстаўлена абвінавачванне паводле крымінальнага артыкулу пра масавыя беспарадкі. 14 траўня 2011 года судом Партызанскага раёну Мінску асуджаны на 3 гады зняволення.

11 жніўня 2011 года Яроменак быў памілаваны Лукашэнкам і вызвалены.