У Беларусі працягваюцца прэвентыўныя затрыманні актывістаў і суды над імі

Актывіста “Еўрапейскай Беларусі” з Дзяржынску Аляксандра Тарнагурскага выклікалі позваю для апытання на 10 гадзін раніцы 24 кастрычніка ў мясцовы РАУС. Позву позна ўвечары напярэдадні ўручыў актывісту супрацоўнік міліцыі Сяргей Касцевіч, але прычыны выкліку патлумачыць не мог.

Нагадаем, 23 кастрычніка ля ўласнага пад’езда супрацоўнікамі міліцыі быў затрыманы лідар беларускіх нацыянал-бальшавікоў Яўген Контуш. Яго даставілі ў суд Маскоўскага раёна Менска, дзе пакаралі арыштам на 5 сутак нібыта за дробнае хуліганства.

Міліцыянты затрымалі таксама актывіста гэтага руху Дзмітрыя Паліенку. Адразу пасля працы ён быў затрыманы на прахадной прадпрыемства і дастаўлены ў аддзяленне міліцыі. Пазней стала вядома, што Паліенка знаходзіцца ў РУУСе Заводзкага раёна Мінска. На яго складзены пратакол па арт.17.1 (дробнае хуліганства). Суддзя Алена Някрасава пакарала актывіста арыштам на 6 сутак.

Вядома таксама, што міліцыянты "палявалі" таксама і на Аляксандра Палякова, аднак яму ўдалося пазбегнуць затрымання. Невядомыя таксама тэлефанавалі ўчора ўвечары і Паўлу Вінаградаву, правяраючы, ці знаходзіцца ён дома, паведамляе праваабарончы цэнтр "Вясна".

У той жа дзень ў Мінску на працоўным месцы а другой гадзіне дня быў затрыманы актывіст кампаніі "Еўрапейская Беларусь" Андрэй Моўчан. Сёння ў судзе Маскоўскага раёна ён быў пакараны арыштам на 5 сутак па арт. 23.34 КаАП (непадпарадкаванне службовай асобе). Суддзя - Таццяна Мотыль.

Увечары затрыманы таксама актывіст Віталь Васількоў. Як паведаміла Святлана Вінаградава, ён паспеў патэлефанаваць увечары Аляксандру Арцыбашаву і паведаміць што яго затрымліваюць. Сёння стала вядома, што Васількоў быў пакараны арыштам на 5 сутак. Праваабаронцы высвятляюць прычыну пакарання.

Асаблівы цынізм гэтых затрыманняў палягае ў тым, што людзей забіраюць проста з працоўных месцаў, абвінавачваючы пры гэтым у дробным хуліганстве.

Сярод магчымых прычын прэвентыўных затрыманняў праваабаронцы называюць паседжанне Савета кіраўнікоў МЗС краінаў СНД, якое пачне сваю працу ў Менску 24 кастрычніка.