Саюз беларускіх пісьменнікаў уступіўся за Логвінава

"Падобнае рашэнне аб прыпыненні дзейнасці ліцэнзіі выглядае ідэалагічна матываваным. У гэтым нам бачыцца ўзмацненне кантролю над недзяржаўнымі выдавецтвамі і далейшае падпарадкаванне інфармацыйнай прасторы дзяржаўнай цэнзуры, што і адлюстравана ў новым Указе Прэзідэнта  № 456 ад 7 кастрычніка 2013 года, які ўносіць змяненні ў парадак вытворчасці друкаванай і паліграфічнай прадукцыі. Уціск і абмежаванні ў галіне друку і выдавецкай справы закранаюць фундаментальныя дэмакратычныя правы і свабоды грамадзянаў Рэспублікі Беларусь", - гаворыцца ў заяве СБП.  

Сакратарыят ГА “Саюз беларускіх пісьменнікаў” далучаецца да заяваў беларускіх і замежных грамадскіх арганізацый у абарону выдавецтва І.П. Логвінаў і настойліва заклікае Міністэрства інфармацыі Рэспублікі Беларусь адмяніць рашэнне аб пазбаўленні І.П. Логвінава выдавецкай ліцэнзіі.

Нагадаем, прыватнае выдавецтва "Логвінаў" пазбаўляюць ліцэнзіі на выдавецкую дзейнасць "у сувязі з дапушчанымі грубымі парушэннямі заканадаўства аб ліцэнзаванні", што, на думку Міністэрства інфармацыі, выразілася ў выданні альбома "Прэс-фота Беларусі — 2011".

У ліcтападзе 2012 года фотаальбомы "Прэс-фота — 2011" былі канфіскаваны ў фатографаў Юліі Дарашкевіч і Аляксандра Васюковіча на пагранічным пераходзе "Каменны Лог" Ашмянскім аддзяленнем мытні і перададзены ў КДБ. Да ацэнкі зместу альбомаў КДБ прыцягнула экспертную камісію на чале з начальнікам упраўлення ідэалагічнай работы Гродзенскага аблвыканкама Паўлам Скрабко. Камісія прыйшла да высновы, што ў альбоме "ўтрымліваюцца наўмысна скажоныя выдумкі аб жыццядзейнасці Рэспублікі Беларусь у палітычнай, эканамічнай, сацыяльнай і іншых сферах, якія не адпавядаюць рэчаіснасці і зневажаюць нацыянальны гонар і годнасць грамадзян Рэспублікі Беларусь". Справа была накіравана ў Ашмянскі раённы суд, які ў красавіку гэтага года прызнаў фотаальбом "Прэс-фота Беларусі — 2011" экстрэмісцкім.

Незалежнае выдавецтва "Логвінаў" існуе з 2000 года. Займаецца выданнем сучаснай беларускай літаратуры, навуковай літаратуры па гуманітарных дысцыплінах, перакладамі на рускую і беларускую мовы.