Мітрапаліт Кандрусевіч просіць маліцца за ксяндза Лазара

Падчас пастырскай сустрэчы духавенства і кансэкраваных асобаў Мінска-Магілёўскай архідыяцэзіі ў Вілейцы Мітрапаліт Мінска-Магілёўскі aрцыбіскуп Тадэвуш Кандрусевіч узгадаў пра арыштаванага КДБ ксяндза Ўладзіслава Лазара.

"Гэтая справа вызвала шырокі рэзананс у Беларусі і свеце і, на жаль, не спрыяла еднасці. Следства працягваецца, і сёння цяжка рабіць здагадкі, чым завершыцца справа. Трэба маліцца ў гэтай інтэнцыі", - прыводзіць словы Кандрусевіча сайт Рыма-Каталіцкага касцёла ў Беларусі.

Арцыбіскуп Тадэвуш Кандрусевіч папрасіў святароў аб далучэнні гэтай справы да малітваў вернікаў, а таксама паводле акалічнасцяў, пасля Імшы, асабліва ў нядзелю, маліцца ў касцёлах аб шчаслівым вырашэнні гэтай праблемы.

Іерарх падзякаваў прысутным за адданую працу, заклікаў да еднасці і папрасіў быць уважлівымі, каб "не быць уцягнутымі ў супрацьпраўныя дзеянні".

"Няхай словы псальма "як добра жыць братам у еднасці” дапамогуць нам будаваць еднасць паміж намі, бо ў гэтым наша сіла", — пажадаў Мітрапаліт.

Нагадаем, пра затрыманне ксяндза Ўладзіслава Лазара стала вядома напрыканцы ліпеня, хаця ён быў арыштаваны яшчэ ў маі. Яго абвінавачваюць у перадачы грошай і матэрыяльных каштоўнасцяў чалавеку, якога падазраюць у шпіянажы на карысць іншай дзяржавы.