Заробкі беларускіх чыноўнікаў зрабілі рэзкі скачок

Да ліпеня сярэдняя зарплата работнікаў органаў дзяржкіравання павялічвалася паступова, пра што сведчыць афіцыйная статыстыка, піша БелаПАН. Так, у студзені гэты паказчык складаў 4,61 млн. рублёў, у лютым — 4,69 млн., сакавіку — 4,83 млн., красавіку — 5,26 млн., маі — 4,98 млн., чэрвені — 5,3 млн. рублёў.

Значны рост зарплат у дзяржорганах у ліпені ў многім абумоўлены скарачэннем колькасці дзяржслужачых. Як паведаміў БелаПАН высокапастаўлены супрацоўнік органаў дзяржкіравання, пад скарачэнне трапілі прыблізна 30% дзяржслужачых. "Адпаведна, на гэту ж велічыню былі павялічаны і зарплаты астатнім работнікам", — зазначыў суразмоўца.

Ініцыятыва аб скарачэнні колькасці штату работнікаў дзяржорганаў з'явілася ва ўрадзе яшчэ восенню 2011 года. З-за дэвальвацыі рубля зарплаты дзяржслужачых істотна знізіліся ў рэальным выражэнні, і, каб спыніць адток кадраў, урад вырашыў скараціць свой апарат з мэтай павелічэння зарплаты астатнім работнікам.

У снежні 2011 года была прынята пастанова ўрада аб скарачэнні цягам 2012 года колькаснага складу апарату Савета міністраў на 20%. Меркавалася, што калі пілотны праект па аптымізацыі колькасці дзяржслужачых на ўзроўні ўрада будзе паспяховым, скарачэнне колькасці дзяржслужачых закране і іншыя дзяржаўныя органы.

У жніўні 2012-га, прадстаўляючы Андрэя Кабякова на пасадзе кіраўніка Адміністрацыі прэзідэнта, Аляксандр Лукашэнка даручыў "распрацаваць канкрэтную сістэму мер па павышэнні прэстыжу дзяржаўнай службы".

У кастрычніку таго ж года ў Беларусі была створана дзряжкамісія для выпрацоўкі прапаноў па аптымізацыі структуры, колькасці і функцый дзяржаўных органаў, якую ўзначаліў Кабякоў. Камісіі было даручана да канца 2012 года ўнесці на разгляд прэзідэнта прапановы аб аптымізацыі колькасці работнікаў дзяржорганаў.

У студзені 2013 года на нарадзе па пытаннях аптымізацыі структуры, колькасці і функцый дзяржорганаў Лукашэнка даручыў да 1 ліпеня скараціць колькасць дзяржслужачых на чвэрць і адначасова з гэтым павялічыць зарплаты дзяржслужачым. "За кошт плана павелічэння зарплаты, можам, я думаю, да канца першага паўгоддзя прыблізна на 50% павысіць. Таму давайце вось такім чынам пойдзем, за першае паўгоддзе ўтрасем поўнасцю гэтую структуру, арыентуючыся на 25% скарачэння колькасці", — сказаў Лукашэнка.

У красавіку 2013 года ён падпісаў указ, што прадугледжвае скарачэнне колькасці работнікаў дзяржорганаў у сярэднім на 25%. Дакумент прадугледжвае правядзенне асноўных працэдур па аптымізацыі сістэмы дзяржорганаў і іншых дзяржарганізацый, а таксама колькасці іх работнікаў да 1 ліпеня.

Як паведамлялася раней, міністэрствы і ведамствы перавыканалі заданне па скарачэнні колькасці работнікаў. Так, напрыклад, колькасць работнікаў падатковых органаў у першым паўгоддзі скарацілася на 26,8%.