У Мінску адкрыўся каталіцкі Каледж тэалогіі

Упаўнаважаны па справах рэлігій і нацыянальнасцяў Леанід Гуляка ўручыў мітрапаліту Мінска-Магілёўскаму арцыбіскупу Тадэвушу Кандрусевічу пасведчанне аб дзяржаўнай рэгістрацыі Мінскага тэалагічнага каледжа імя св. Яна Хрысціцеля. Гэтая духоўная навучальная ўстанова Мінска-Магілёўскай архідыяцэзіі заснавана мітрапалітам на базе Цэнтра падрыхтоўкі катэхэтаў. Дырэктарам каледжа прызначаны ксёндз Ян Крэміс, паведамляе прэс-служба Рыма-Каталіцкага Касцёла ў Беларусі.

Галоўнай задачай каледжа з’яўляецца падрыхтоўка спецыялістаў для рэлігійнай дзейнасці. Тут можна будзе атрымаць веды ў галіне тэалогіі, філасофіі, катэхізацыі, біблістыкі, літургіі, гісторыі, касцёльнага права, дабрачыннасці, сямейнага жыцця, рэлігійных сродкаў масавай камунікацыі і інш. Заснаванне каледжа з’яўляецца важным этапам на шляху да ўзнікнення ў будучыні Вышэйшай каталіцкай навучальнай установы, якая вельмі патрэбна ў сталіцы Беларусі, зазначаюць у Касцёле.