Алесь Прышывалка: Каб прыйшлі і сказалі: "Дзякуй за хлеб!"

Хлеб hand made ад Алеся Прышывалкі і яго праекту Zorny стаў, бадай, найцікавейшай прэзентацыяй на апошнім экалагічным аграфэсце ў Мінску. Другое месца "ЕўраБеларусь" аддае беларускім кавунам, але пра іх гаворка ў наступных матэрыялах нашай рубрыкі.

- Ад вашага стэнду з хлебам людзей не адагнаць! Што за праект?

- Даследуем беларускую хлебную традыцыю, а таксама традыцыю беларускіх ласункаў. Таксама спрабуем аднаўляць традыцыйны беларускі хлеб і старадаўнія шляхетныя ласункі. Дэгустацыю зладзілі на аграфэсце. Распавядалі таксама пра канцэпцыю "Штукарскі хлеб".

- Падрабязней пра канцэпцыю...

- Складаецца яна з трох асноўных элементаў. Найпершы і галоўны элемент – гэта традыцыя, гэта галоўнае, на чым мы грунтуемся. Мы выкарыстоўваем традыцыйныя складнікі для хлебу і традыцыйную тэхналогію. Для нас гэта вельмі важны элемент, бо мы лічым, што традыцыя гэта тое, што надае нам унікальнасць. Тое, што можа вылучыць Беларусь у сучасным глабальным свеце.

Другі складнік – гэта натуральнасць. У перспектыве – экалагічнасць. Мы пакуль не кажам пра экалагічнасць, бо яшчэ не выкарыстоўваем абсалютна экалагічныя складнікі, пакуль толькі рухаемся ў гэтым накірунку. То бок не вырошваем і не вырабляем яшчэ самі складнікі для хлеба. Але і не ўжываем аніякай хімічнай трасцы пры яго вырабе. Гэты хлеб робіцца якраз так, як рабілі яго нашыя продкі спрадвеку.

І тут мы прыходзім да трэцяга складніку нашай канцэпцыі. Гэта – ручная праца, гэта – аўтарства. Каб перадаць хлебу сваю душэўнасць, цеплыню, любоў і каб чалавек, які спажые гэты хлеб, ведаў, да каго ён можа прыйсці і падзякаваць, што смачна было. На хлебазавод так не прыйдзеш, пагадзіся.

- Што, акрамя хлебу?

- У планах - разнастайныя ласункі. Вось ідзе сезон дзеля яблычнага сыру. Будзе шмат чаго смачнага!

Нагадаем, Другі фэст арганічнай сельскай гаспадаркі прайшоў у "Галерэі Ў" 31 жніўня-1 верасня, арганізатарам выступілі грамадскае аб'яднанне "Экадом", "Зялёная сетка" і непасрэдна "Галерэя Ў".