Вярхоўны суд пакінуў у сіле прысуд Андрэю Гайдукову

Паседжанне, на якім разглядалася касацыйная скарга Андрэя Гайдукова, адбывалася ў закрытым рэжыме, на ім прысутнічалі толькі адвакаты, перадае Радыё Свабода.

Нагадаем, што Андрэй Гайдукоў 1 ліпеня 2013 года Віцебсікм абласным судом быў прызнаны вінаватым у спробе ўсталявання кантактаў з супрацоўнікамі замежнай спецслужбы без прыкметаў здрады дзяржаве. У якасці пакарання суд першай інстанцыі прызначыў Гайдукову пазбаўленне волі тэрмінам паўтара года у калоніі агульнага рэжыму.

Першапачаткова Андрэй Гайдукоў абвінавачваўся па арткуле 356 Крымінальнага кодэксу Беларусі (здрада дзяржаве ў форме правядзення агентурнай дзейнасці).

Скаргу на прысуд Віцебскага абласнога суда Андрэй Гайдукоў накіраваў у сярэдзіне ліпеня. На мінулым тыдні ў газеце “СБ. Беларусь сегодня” з’явіўся шэраг публікацый з матэрыяламі следства па справе Гайдукова. Праваабаронцы запатрабавалі спыніць публікаванне матэрыялаў справы і высветліць, ці законным чынам яны былі разгалошаныя.