У Вілейскім раёне міліцыя затрымала больш за 100 ўдзельнікаў фестывалю цяжкой музыкі

Фэст з удзелам metal-hardcore, punk і punk-hardcore - гуртоў праходзіў 24 жніўня каля вёскі Асіповічы, піша БелаПАН. На яго з'ехаліся маладыя людзі з розных гарадоў Беларусі.

Як паведаміла адна з удзельніц фэсту, Жанна Міхеева з Гомеля, прыкладна а 19.00 на фэсце раптам з'явіліся супрацоўнікі міліцыі і ДАІ.

"Гуртам давялося скончыць выступы, а ўдзельнікаў фэсту пачалі затрымліваць і везці ў Вілейскі РАУС, прычым не тлумачачы за што. У міліцыянтаў не было знакаў, іх прасілі прадставіцца, растлумачыць прычыну затрымання, але ўсё бессэнсоўна", - распавяла дзяўчына.

З ейных слоў, удзельнікаў фэсту везлі на некалькіх аўтамабілях, а потым прыехаў і аўтазак.

Жанна Міхеева дакладна не ведае, колькі людзей забралі ў міліцыю. З ейных слоў, на фэсце было блізу 400 чалавек, затрымалі прыкладна 100-150.

У Вілейскім РАУС пацвердзілі затрыманне маладых людзей. Аднак на пытанне аб колькасці затрыманых заявілі, што гэтая інфармацыя з'яўляецца "службовай". Паводле словаў дзяжурнага, маладыя людзі затрыманыя за ўчыненне адмiнiстрацыйных правапарушэнняў, якіх менавіта - не ўдакладнілі.