Па сканчэнні адміністратыўнага спагнання МЗС вярнуў журналісту акрэдытацыю

Як паведамляе “Еўрарадыё”, Павел Свярдлоў атрымаў ад МЗС Беларусі гадавую акрэдытацыю. Рашэнне пазбавіць журналіста акрэдытацыі было прынятае ў студзені 2013 года на падставе таго, што ўлетку 2012 года Павел Свярдлоў быў прыцягнуты да адміністратыўнай адказнасці за нецэнзурную лаянку ў грамадскім месцы.

22 чэрвеня 2012 года карэспандэнт Еўрарадыё Павел Свярдлоў выйшаў на працу з пад’езда свайго дома і быў затрыманы людзьмі ў цывільным. Супраць журналіста распачалі справу па артыкуле 17.1 Адміністрацыйнага кодэкса — дробнае хуліганства. У той жа дзень суддзя Таццяна Матыль пакарала Свярдлова 15-цю суткамі арышту. Пакаранне ён адбываў у мінскім ізалятары на вуліцы Акрэсціна.

Суды вышэйшай інстанцыі, у тым ліку і Вярхоўны суд, пакінулі пастанову аб арышце без зменаў, нягледзячы на тое, што з’явіўся грамадзянскі сведка інцыдэнту, які абвяргаў паказанні міліцыянтаў.

Згодна з п.15.2 Палажэння аб парадку акрэдытацыі журналістаў замежных СМІ, МЗС мае права пазбавіць акрэдытацыі карэспандэнта ў выпадку парушэння ім “заканадаўства Рэспублікі Беларусь”.

Праз год пасля прысуду адміністрацыйнае спагнанне здымаецца. Адпаведна, у ліпені 2013 года Карэспандэнцкі пункт Еўрарадыё ізноў падаў у МЗС дакументы на акрэдытацыю Паўла Свярдлова. Просьба была задаволеная. З 20 жніўня журналіст вяртаецца да працы ў інфармацыйнай рэдакцыі радыё.