Улады не знайшлі падставаў для адмены спагнанняў Алесю Бяляцкаму

У адказе за подпісам часовага выканаўца абавязкаў начальніка УДВП па Магілёўскай вобласці Юрыя Талкачова гаворыцца, што спагнанні ў дачыненні Алеся Бяляцкага былі накладзеныя за парушэнне зняволеным Правілаў унутранага распарадку Бабруйскай папраўчай калоніі №2, паведамляе прэс-служба Беларускай асацыяцыі журналістаў.

Нагадаем, што 4 жніўня ГА “Беларуская асацыяцыя журналістаў” звярнулася да адміністрацыі калоніі, а таксама УДВП па Магілёўскай вобласці з просьбай правесці праверку і адмяніць накладзеныя спагнанні.

Праўленне ГА “БАЖ” у сваім звароце адзначыла, што вынесеныя спагнанні з'яўляюцца формай ціску на зняволенага і звязаныя з грамадзянскай пазіцыяй праваабаронцы, а не ягонымі правінамі ў калоніі.

У хуткім часе пасля гэтага з'явілася інфармацыя, што Бяляцкі ўсё ж атрымаў першую ў гэтым годзе харчовую перадачу.