Ветслужба: План барацьбы з чумой свіней - дзяржтаямніца

Размова з Куцко адбылася калі прадстаўнікі Беларускай хрысціянскай дэмакратыі прынеслі ў Мінсельгасхарч зварот з патрабаваннем у тры дні абнародаваць план барацьбы з афрыканскай чумой свіней. Што можа быць таямнічага ў гэтым плане, Аляксандр Куцко сказаць не змог, паведамляе прэсавая служба БХД.
 
Разам з тым ён адзначыў, што кожны дзень вынікі барацьбы з АЧС падаюцца ў выглядзе справаздачы Аляксандру Лукашэнку, які трымае сітуацыю на асабістым кантролі. Гэта, маўляў, ёсць доказам таго, што фермерам і сялянам няма чаго хвалявацца. А значыць, сказаў ён, людзі павінны падтрымліваць дзеянні ўладаў.

Аляксандр Куцко таксама паведаміў, што ўлады працягнуць знішчаць свіное пагалоўе ў прыватных гаспадарках, каб гарантаваць бяспеку свінакомплексаў. Паводле яго словаў, у прыватных гаспадарках складаней кантраляваць эпідэміялагічную сітуацыю, у той час як свінакомплексы прыносяць грошы ў бюджэт. З заўвагай, што менавіта на свінакомплексах часцей і болей паміраюць свінні, ён не пагадзіўся. Чыноўнік таксама заявіў, што ўлады не будуць пераносіць свінакомплексы, пабудаваныя насуперак санітарным нормам заблізка да сялянскіх гаспадарак, бо гэта вельмі дорага і шмат грошаў у іх ужо ўкладзена.

Апроч таго, Аляксандр Куцко заявіў, што кампенсацыя, якую дзяржава выплочвае сялянам за знішчаных свінняў, вельмі добрая. На заўвагу, што гэта ў некалькі разоў менш за тое, што маглі б атрымаць сяляне за незабітых свінняў, ён не прарэагаваў.

Чыноўнік таксама паведаміў, што зараз з тэрыторыі Літвы на Беларусь можа прыйсці хвароба, небяспечная ўжо для буйнога рагатага быдла. Аднак, заверыў ён, вынішчэнне кароваў не плануецца.