Arche распачаў рэгіянальныя прэзентацыі з Гродна

Часопіс Arche распачаў шэраг рэгіянальных прэзентацый. Першая з іх адбылася 30 ліпеня ў Гродне і менавіта ў тым памяшканні, дзе ўвосень мінулага года быў затрыманы галоўны рэдактар часопіса Валер Булгакаў.

Ён пацвердзіў БелаПАН, што месца першай прэзентацыі выбрана не выпадкова: "У Гродне вельмі багатае культурнае жыццё. І так сталася, што ўкладальнікі нумара, прысвечанага гістарычнай палітыцы і гістарычнай памяці, прадстаўляюць гарадзенскі ўніверсітэт і гарадзенскую школу беларускай гістарыяграфіі, таму выбар быў абумоўлены гэтымі практычнымі меркаваннямі, а з другога боку — мы хочам паказаць пераемнасць паміж канцом і пачаткам праекта пад назвай Arche".

Паводле слоў Булгакава, менавіта з затрымання 14 верасня 2012 года ў гэтым памяшканні пачаўся пераслед часопіса.

Нагадаем, Булгакаў быў затрыманы на прэзентацыі кнігі "Саветызацыя Заходняй Беларусі" і абвінавачаны ў незаконнай прадпрымальніцкай дзейнасці.

"Здавалася, што часопіс не выжыве і будзе зачынены, а галоўны рэдактар нават сядзе ў турму па крымінальным абвінавачванні, але, на шчасце, нам удалося перажыць гэтую найчарнейшую паласу, і мы пачынаем шлях у лепшую будучыню", — працягнуў Булгакаў.

Апроч прэзентацыі двух новых нумароў часопіса Arche, перад прысутнымі быў арганізаваны выступ гісторыка Алеся Белага, які паведаміў аб праекце "Наша страва" і сваёй узноўленай працы "Хроніка Белай Русі". "Наша страва" была прэзентавана кнігай і міні-серыялам.

У розных рэгіёнах Беларусі прэзентацыі часопіса будуць працягвацца.